KUADRI LIGJOR PËR FONDET E PENSIONIT PRIVAT NË SHQIPËRI
BAZA LIGJORE

Ligji Nr. 76/2023 “Për fondet e pensionit privat” i miratuar nga Kuvendi i Republikës së Shqipërisë në datën 21.09.2023 dhe aktet nënligjore të dala në zbatim të tij, miratuar nga Autoriteti i Mbikëqyrjes Financiare, përcaktojnë kuadrin ligjor për krijimin, licencimin, administrimin dhe mbikëqyrjen e fondeve të pensionit privat në Republikën e Shqipërisë.

Kërkesat e ligjit dhe rregulloreve janë të inkorporuara në dokumentin “Prospekt”, i cili përbën dokumentin themeltar të çdo fondi të pensionit privat.

Prospekti i fondit të pensionit nuk përfaqëson ftesë për anëtarësim në fond, por shërben si mjet informues lidhur me tiparet, karakteristikat dhe rreziqet që mbart anëtarësimi në një fond pensioni privat.

QËLLIMI I LIGJIT

Qëllimi kryesor i ligjit është të krijojë një sistem të qëndrueshëm dhe të sigurt të fondeve të pensionit privat, i cili:

• Plotëson sistemin shtetëror të sigurimeve shoqërore;
• U mundëson qytetarëve të sigurojnë të ardhura shtesë në moshën e pensionit;
• Nxit kursimin afatgjatë dhe zhvillimin e tregut financiar në vend;
• Siguron mbrojtjen e interesave të anëtarëve dhe transparencë të plotë në administrim;

ROLI I INSTITUCIONEVE PËRKATËSE

Autoriteti i Mbikëqyrjes Financiare:

• Licencon dhe mbikëqyr shoqërinë administruese dhe bankën depozitare;
• Harton dhe zbaton rregulloret për funksionimin e fondeve të pensionit privat;
• Kontrollon ligjshmërinë dhe mbrojtjen e anëtarëve të fondeve;

Shoqëria Administruese:

• Administron fondin në përputhje me ligjin dhe rregulloret;
• Investon aktivet në mënyrë të kujdesshme, transparente dhe në interesin më të mirë afatgjatë të anëtarëve;
• Siguron një strukturë qeverisjeje, menaxhim risku dhe audit të brendshëm të përshtatshëm;
• Informon rregullisht anëtarët për mbarëvajtjen e fondit dhe gjendjen e llogarisë së

Depozitari:

• Licencohet nga Banka e Shqipërisë dhe Autoriteti i Mbikëqyrjes Financiare për aktivitetin e kujdestarisë dhe depozitarit të Fondeve të Pensionit;
• Rregullohet dhe mbikëqyret nga AMF;
• Ruan asetet e fondit në mënyrë të sigurt dhe mbron interesat e anëtarëve në fond;
• Raporton çdo shkelje të Shoqërisë Administruese në AMF;
• Kryen funksionin e kontrollit të zbatimit të ligjshmërisë dhe raportimit të pavarur për

PARIMET E FUNKSIONIMIT TË LIGJIT

Ligji për fondet e pensionit privat bazohet në këto parime kryesore:

• Pavarësia e aktiveve: Aktivet e fondeve janë të ndara nga pasuritë e Shoqërisë Administruese dhe të Bankës Depozitare;
• Mbrojtja e anëtarëve: Fondet janë të mbrojtura nga rreziqe të jashtme dhe nuk mund të përfshihen në procedura falimentimi të Shoqërisë Administruese apo të Bankës Depozitare;
• Siguria e aktiveve: Aktivet e fondit nuk mund të jenë objekt i pretendimeve ose i ekzekutimeve, të kryera në emër dhe për llogari të kreditorëve të Shoqërisë Administruese apo të Depozitarit;
• Transparenca: Informacioni për anëtarët dhe investimet publikohen në mënyrë të qartë dhe të rregullt;
• Mbikëqyrja e vazhdueshme: AMF siguron respektimin e ligjit dhe rregulloreve përkatëse;
• Llogaridhënia dhe raportimi: Çdo institucion përgjegjës raporton në mënyrë të pavarur për veprimtarinë dhe rezultatet e fondit;

INFORMACIONE SHTESË

Ju mund ti referoheni faqes zyrtare të rregullatorit Autoritetit të Mbikëqyrjes Financiare (AMF) për legjislacionin, publikime dhe të rejat më të fundit lidhur me fondet e pensioneve dhe fondet e investimeve që operojnë në Republikën e Shqipërisë.